Ég er ekki hættur

...en þetta verður víst svona í framtíðinni; póstur á tveggja vikna til tveggja mánaða fresti. Það er betra en ekki neitt.

Vonandi hafa jólin verið yndisleg hingað til, og vonandi verður komandi ár alveg geggjað!!!

Myndir

Myndir frá listakvöldinu sem ég tók þátt í með leikfélaginu Tangled Feet eru komnar á fésbókina, ef þið skilduð vera forvitin...

Langt síðan síðast...

Já, langt síðan að ég skrifaði eitthvað hérna inn. En það er ekki þar með sagt að ekkert hafi gerst, langt því frá!

Átti eina af verstu vikum lífs míns í byrjun mánaðarins: veiktist á mánudeginum og missti 2 daga úr vinnu, en þurfti þess í stað að standa í því að pakka saman og þrífa íbúðina okkar, þar sem við vorum búin að finna nýja íbúð og vorum að fara að flytja út á miðvikudeginum. Kathrin hringdi frá Sviss á mánudagskvöldið og sagði mér að sambandið okkar myndi ekki ganga, en hún vildi hitta mig á fimmtudaginn eins og við höfðum ákveðið að við myndum gera þegar hún væri komin til baka. Þriðjudagskvöldið fáum ég, Auðunn og Vala þær fréttir að eigandi íbúðarinnar sem við ætluðum að flytja í væri hættur við okkur og ætlaði að leigja bænum hana. Við sem sagt heimilislaus.
Hitti svo Kathrin á fimmtudag og fæ það á hreint að ekkert muni ganga okkar á milli (nenni ekki að útskýra það frekar hér, er búinn að gera það nógu oft, en hlutirnir eiga eftir að lagast og við munum alveg geta unnið saman og verið vinir). Ástarsorg gerði næstu daga ómögulega, og ekki bætti úr að vinnan var sérlega erfið á föstudagskvöldið.

En, ekki hefur þetta allt verið eintómt væl og volæði. Við erum komin í nýja íbúð eftir að hafa gist hjá velviljandi vinum, ég vann örstutt með félagi sem heitir Tangled Feet, og við sýndum hálfgert lifandi tónlistarmyndband á stórskemmtilegu listakvöldi þar sem fullt skemmtilegt var í gangi. Ég stóð meðal annars í því að dangla úr siglínu til þess að láta stelpu sem var á hinum endanum rísa og falla rúma 4 metra. Það var gaman. Svo voru hljómsveitirnar sem spiluðu þarna alveg magnaðar, og ég dansaði meira en ég hef gert í langan tíma.

Svo er ég að fara að vinna með uppáhalds kennaranum mínum úr Rose Bruford í næstu viku, sem verður gaman, og von að eitthvað frekara gerist upp úr því.

Meira dettur mér ekki í hug í bili.

Sjáumst eftir 2 mánuði eða svo... en vonandi fyrr :)

Bara svo þið vitið það,

þá eru ágætis líkur á því að ég flytji einhvern tímann til Bern. Þvílík borg! Aðeins stærri en Reykjavík, og mikið fallegri. Lífið hérna er alveg stórfínt, sem við gistum í eru á efstu 2 hæðum leikhússins, þannig að það er lítið mál að koma sér í vinnuna, við erum með 2 eldhús, 2 baðherbergi, internetaðgang og svo er ísskápur í búningsherberginu sem starfsfólk Slachthaus Teater fyllti með vatni, kók, eplasafa og bjór :)

Fyrsta sýning á morgun, og nær uppselt á hana: 115 manns komnir.

Borðaði hjá "tengdaforeldrunum" í gær, 3 mismunandi tegundir af svissneskum pylsum, nautakjöt og grænmeti, og plómubaka í eftirrétt. Ég var dálítið illa fyrirkallaður í gærmorgun og fram eftir degi, en í dag er ég nýr maður!

Það er yfir fáu að kvarta.

Kominn aftur út

Kominn "heim" í Catford, og við tekur stress yfir tóma herberginu í íbúðinni okkar. Við spyrjum að leikslokum hvað það varðar.

Eyjar voru notalegar, og lokakvöldið var einkar ánægjulegt. Ég át dýrindis lambasteik með gamla settinu, fékk Öldu og Birnu í heimsókn, og kíkti svo með Zindra heim til Hildar og Eyvinds, þar sem þjóðarheiti voru rædd og leiðrétt. Við komumst að því að fólk frá Sviss kallast ekki Svisslendingar, heldur Svissar, enda heitir landið ekki Svissland. Frá Póllandi koma Póllendingar, Danmerkingar frá Danmörku og Svíþýðingar frá Svíþjóð.

Nú er bara að vinna og spara alla þessa viku, og reyna að springa ekki úr spenningi yfir því að fara til Sviss á mánudagsmorguninn, og hitta Kathrin aftur.

Þær gerast vart betri, heimferðirnar

Er í Eyjum, og slaka loksins almennilega á.

Síðan að ég kom til landsins er búið að vera voðalega lítið stoppað, þar sem maður hefur verið út og suður annað hvort að hitta vini og ættingja, undirbúa sýningar, sýna fólki borgina (og dálítið af landinu), og bara hvað sem er annað en að hvíla sig. Ég ýki kannski aðeins, við kíktum alveg í sund og potta og svona, og ég man eftir að hafa glápt á Heima eftir Sigur Rós með Kathrin og Rebecu á laugardaginn, en það voru bara stundir milli stríða.

Kom með Kathrin og Rebecu til Eyja á sunnudagskvöldið, og eftir smá síðnætursnarl drifum við okkur út í leit að lundapysjum. Það þykir víst frekar mikil bjartsýni að reyna að finna eina svoleiðis þessa dagana, en það sakar ekki að reyna. Fundum samt enga einustu.
Daginn eftir var farið í bíltúr um eyjuna, stelpunum sýnt Pompeii norðursins, sprangið, Herjólfsdalur og fleira, og svo var þetta allt toppað með tuðruferð í kring um eyjuna í boði Ölmu og Frikka, með Himma Nínon við stjórnvölinn. Frábær ferð, og stelpurnar alveg í skýjunum!

Nú ligg ég bara upp í rúmi í náttbuxunum og spái í því hvort ég eigi ekki að drífa mig í sturtu fyrir hádegi...

jú, ætli það ekki

Á Íslandi

Hópurinn er hæstánægður með ferðina hingað til. Nú er streitulevelið hins vegar sífellt hækkandi, þar sem ýmsar reddingar eru í gangi, og sýningar á morgun og fimmtudaginn. En það er samt bara allt samkvæmt uppskriftinni.

Músíkantarnir okkar spila í Nývöruverslun Hemma og Valda kl. 21 í kvöld (ef ske kynni að einhver sem hefur áhuga á framúrstefnutónlist skildi kíkja hér inn á næstu 2 tímum), og svo er bara að rokka í Iðnó!

Pantið miða í 562-9700

Sjáumst!